انتقل للمحتوى

إلغاء طلب

متى تقدر تلغي الطلب، ووش يصير للمبلغ والمخزون والفاتورة.


تلغي الطلب من صفحته: افتح «الطلبات»، اختر الطلب، وبعدها «إجراءات أكثر» ثم «ألغِ الطلب». الإلغاء ما له رجعة: الطلب يبقى في السجل بحالة «ملغي» وما تقدر تفتحه من جديد.

متى يكون الإلغاء متاح

يظهر «ألغِ الطلب» ما دام الطلب «جديد» أو «قيد التجهيز» أو «معلّق» أو «جاهز للشحن». أول ما يصير «تم الشحن» يختفي الخيار، لأن الطرد صار مع شركة الشحن. والإلغاء طلب طلب: ما تلقاه في تغيير الحالة الجماعي.

خطوات الإلغاء

  1. افتح الطلب واضغط «إجراءات أكثر»، وبعدها «ألغِ الطلب».
  2. قرّر في خانة المبلغ لو ظهرت لك (تحت نشرح متى تظهر).
  3. اكتب «السبب» لو تبي. هو لك أنت، والعميل ما يشوفه.
  4. خلّ «رجّع الأصناف للمخزون» مفعّلة لو تبي الكميات ترجع، أو شل علامتها.
  5. اضغط «ألغِ الطلب»، أو «ألغِ الطلب ورجّع المبلغ» لو خانة المبلغ مفعّلة.

وش يصير للمبلغ

  • طلب مدفوع بالبطاقة: تطلع خانة ترجّع المبلغ لبطاقة العميل، ومفعّلة من البداية، والمبلغ هو كل الباقي على الطلب. لو خليتها، نرجّع المبلغ عن طريق مزوّد الدفع أول، وبعدها نلغي الطلب. ولو رفض المزوّد الاسترداد، ما نلغي شي.
  • لو شلت العلامة، ينلغي الطلب والمبلغ يبقى عندك، وتقدر ترجّعه بعدين من «إجراءات أكثر» ثم «رجّع مبلغ للبطاقة».
  • طلب سجّلته يدوي إنه مدفوع (تحويل بنكي أو كاش أو جهاز الشبكة): تطلع خانة تسجّل إنك رجّعت المبلغ للعميل. هذا تسجيل في الطلب بس، والفلوس ترجّعها أنت.
  • الدفع عند الاستلام: ما فيه خانة مبلغ، لأنك ما استلمت شي للحين. وبطاقة «الدفع» في الطلب تصير «ملغي، ما فيه شي تحصّله».
  • طلب دفعت فيه بطاقة هدية: الخانة مكتوب عليها «رجّع ... لبطاقة الهدية»، وإذا البطاقة البنكية دفعت الباقي «رجّع ... لبطاقة الهدية و... لبطاقة العميل». لو خليتها مفعّلة، اللي دفعته بطاقة الهدية يرجع لها على طول.
  • طلب انباعت فيه بطاقات هدايا: لو خانة المبلغ مفعّلة، البطاقات اللي انباعت وباقي فيها رصيد توقف نهائيا، والباقي فيها يرجع لبطاقة العميل مع باقي المبلغ. والنافذة تقولها لك قبل التأكيد: «... منه عن بطاقات الهدايا اللي انباعت في الطلب: توقف نهائيا، واللي انصرف منها ما يرجع.» ولو شلت العلامة، البطاقات تبقى شغّالة مع المشتري.

الاسترداد للبطاقة فلوس تتحرك فعلا، وما تقدر تتراجع عنه. راجع المبلغ قبل ما تضغط «ألغِ الطلب ورجّع المبلغ».

المخزون والفاتورة الضريبية

  • لو خليت «رجّع الأصناف للمخزون» مفعّلة، كل صنف يتتبع مخزونه يرجع للموقع اللي انسحب منه، والباقة ترجّع مكوناتها. الأصناف اللي ما تتتبع مخزون ما تتغيّر، وأكواد المنتجات الرقمية ما ترجع.
  • الطلب يرجع للمخزون مرة وحدة بس. لو رجّعته بالإلغاء، أي استرداد بعده مع نفس الخانة ما يضيف شي.
  • لو للطلب فاتورة ضريبية مقبولة عند ZATCA، نرفع إشعار دائن لها تلقائيا.

وش يشوف العميل

ما نرسل للعميل أي إيميل عن الإلغاء. يشوف الطلب «ملغي» لو فتح صفحة تتبع الطلب في متجرك أو حسابه، والسبب اللي كتبته ما يظهر له. لو تبي تبلّغه، تواصل معه بنفسك من بطاقة «العميل» في صفحة الطلب.

لو ما ضبط الإلغاء

  • «أحد ثاني عدّل الطلب. حدّث الصفحة وجرّب.»: الطلب تغيّر قبلك. حدّث الصفحة وشوف حالته الحين.
  • «مزوّد الدفع رفض الاسترداد. ما رجع أي مبلغ، فتقدر تجرّب مرة ثانية.»: الطلب ما انلغى. جرّب مرة ثانية، أو شل علامة المبلغ وألغِه، ورجّع المبلغ بعدين.
  • لو رجع المبلغ وفشل الإلغاء بعده، اضغط مرة ثانية: نلغي الطلب بدون ما نرجّع المبلغ مرتين.
  • «انتهت جلستك. سجّل دخول وجرّب مرة ثانية.»: سجّل دخول من جديد. لو كنت عضو في الفريق وتكررت الرسالة، يمكن صلاحياتك ما تشمل إلغاء الطلبات أو استردادها؛ كلّم صاحب المتجر.
  • «بطاقة الهدية موقّفة، فما رجع لها شي. أصدر للعميل بطاقة جديدة مكانها.»: الطلب ما انلغى. شل علامة المبلغ وألغِه، وأصدر للعميل بطاقة هدية جديدة، وإذا فيه مبلغ مدفوع بالبطاقة البنكية رجّعه بعدين من «إجراءات أكثر».

المزيد في الطلبات