عقيل ما فيه نظام مرتجعات أو استبدال، والعميل ما يقدر يطلب إرجاع من المتجر. اللي موجود: حالتين للطرد اللي فشل توصيله ويرجع لك، والاسترداد من صفحة الطلب مع خانة إرجاع الأصناف للمخزون. كل هذا من «الطلبات» ثم صفحة الطلب.
لما يفشل التوصيل
- افتح الطلب وهو «تم الشحن».
- اضغط «غيّر الحالة» واختر «فشل التوصيل».
ما نرسل للعميل إيميل عن هالحالة. لو فتح صفحة تتبع الطلب يشوف «لم يكتمل التوصيل» ومعها «سيتواصل معك المتجر ليرتب التوصيل من جديد.»، فتواصل معه أنت من بطاقة «العميل».
تشحنه مرة ثانية
على طلب «فشل التوصيل» اضغط «اشحنه مرة ثانية». تفتح نفس نافذة الشحن وفيها بيانات التتبع القديمة، تعدّلها لو تغيّرت وتأكّد. الطلب يرجع «تم الشحن». إيميل الشحن ينرسل مرة وحدة للطلب، فالعميل ما يوصله إيميل ثاني.
لما يرجع الطرد لك
- على طلب «فشل التوصيل» اضغط «غيّر الحالة» واختر «قيد الإرجاع».
- لما يوصلك الطرد، اضغط «أكّد وصول المرتجع» وأكّد.
«تم الإرجاع» آخر حالة، وتغيّر الحالة بس: ما ترجّع الأصناف للمخزون ولا المبلغ للعميل. والحالتين «قيد الإرجاع» و«تم الإرجاع» ما توصلها إلا من «فشل التوصيل».
المخزون والمبلغ بعد الإرجاع
- طلب مدفوع بالبطاقة أو سجّلته مدفوع: من «إجراءات أكثر» رجّع المبلغ، وخلّ «رجّع الأصناف للمخزون» مفعّلة عشان ترجع الكميات. الخانة ترجّع الطلب كله، مرة وحدة.
- طلب الدفع عند الاستلام اللي رجع: ما استلمت مبلغ، فما فيه شي ترجّعه. عدّل الكميات بنفسك من صفحة «المخزون».
العميل يبي يرجّع طلب وصله
«تم التوصيل» آخر حالة، والطلب ما يتحرك بعدها لأي حالة إرجاع. لو اتفقت مع العميل على إرجاع، تابعه خارج الحالات: لما يوصلك المنتج رجّع المبلغ من «إجراءات أكثر». لو رجع جزء من الطلب بس، شل علامة «رجّع الأصناف للمخزون» وعدّل كمية الصنف من «المخزون»، لأن الخانة ترجّع الطلب كله.
سياسة الإرجاع في متجرك
في «الإعدادات» ثم «السياسات»، بطاقة «قواعد الإرجاع والإلغاء» فيها «مدة الإرجاع» و«مدة استرداد المبلغ». هذي أرقام تطلع في نص سياساتك اللي يقراه العميل، ونظامنا ما يطبّقها على الطلبات: ما يقفل الاسترداد بعد المدة.