انتقل للمحتوى

صفحتك الرئيسية

وش في «الرئيسية»: صورة متجرك وخطوات البداية والاختصارات.


«الرئيسية» أول صف في القائمة الجانبية، وهي أول صفحة تفتح لك بعد الدخول. ما هي لوحة مبيعات: ما فيها أرقام مبيعات ولا زيارات، وهذي تلقاها في «التحليلات». الصفحة تتحدّث من نفسها كل 30 ثانية تقريبا، فالطلبات الجديدة تظهر بدون ما تحدّثها.

صورة متجرك

فوق الصفحة صورة لأعلى واجهة متجرك، نلتقطها بعد كل بناء وتعديل ونشر. عليها «منشور» أو «مسودة»، والضغط عليها يفتح متجرك في الاستوديو. إذا متجرك المنشور متأخر عن آخر تعديلاتك، يظهر عليها زر «انشر التعديلات» وتنشر من مكانك. وإذا النشر موقف لأن متجرك ما فيه منتج، يظهر زر «أضف منتج» بداله.

شريط المساعد

تحت الصورة سؤال «هلا، كيف أقدر أخدمك اليوم؟» وخانة «اشتغل مع عقيل». اكتب فيها اللي تبيه، مثل خصم على مجموعة، ويفتح لك المساعد ومعه رسالتك.

خطوات البداية

لين يجهز متجرك للبيع تشوف بطاقة «خطوات البداية» فيها عدد اللي خلصت منها وشريط تقدّم. الخطوة اللي خلصت عليها علامة وما تنضغط، والخطوة اللي بعدها مميّزة.

  • «ابنِ متجرك» أو «انشر متجرك»: تفتح الاستوديو.
  • «فعّل الدفع بالبطاقة»: تفتح تفعيل الدفع في «الإعدادات» ثم «المدفوعات». وقت المراجعة ممكن تشوف «الدفع بالبطاقة متوقف مؤقتا» أو «نشغّل الدفع بالبطاقة…»، وهذي ما فيها شي تضغطه.
  • «أضف أول منتج»: تفتح منتج جديد.
  • «أضف صور لـ 3 منتجات» مثلا: اختيارية، تفتح منتجاتك المعروضة اللي ما لها صور، وتختفي أول ما يصير لكل منتج صورة.
  • «اربط دومينك»: اختيارية، تفتح «الإعدادات» ثم «الدومين».

ثلاث خطوات بس تقفل البطاقة: متجر منشور، والدفع بالبطاقة شغّال، ومنتج واحد على الأقل. بعدها تختفي البطاقة. ونفس الخطوات تظهر صغيرة في القائمة الجانبية في كل صفحة غير «الرئيسية»، وتقدر تطويها بـ «أخفِ الخطوات».

جنب البطاقة بطاقتين: «استورد منتجاتك» تفتح استيراد المنتجات من سلة أو زد (وتختفي بعد أول استيراد)، و«جهّز التوصيل» تفتح «الإعدادات» ثم «الشحن».

الاختصارات

بعد ما تخلص الخطوات الأساسية يحل مكانها صف «اختصارات». أول زر يتغيّر حسب اللي يحتاجه متجرك الحين: «أكّد طلبين» مثلا لو فيه طلبات جديدة، أو «عبّي المخزون» لو فيه منتجات نفدت، وإلا «أضف منتج». بعده:

  • «أضف منتج»، إذا كان أول زر غيره.
  • «أنشئ طلب» و«أنشئ خصم» و«شغّل عرض».
  • «رتّب الأقسام»: تفتح «المجموعات» لترتيبها.
  • «عدّل متجرك» و«العملاء» و«التحليلات».
  • في المتجر المنشور: «انسخ الرابط» و«اعرض متجرك».
  • «المزيد»: «الصفحات» و«الفواتير» و«الدومين» و«الإعدادات»، ومعها أي زر ما وسعه الصف.

المزيد في البداية