انتقل للمحتوى

فعّل الدفع بالبطاقة في متجرك

طلب تفعيل الدفع بالبطاقة من أول خطوة إلى أن يشتغل.


الدفع بالبطاقة يخلي عملاءك يدفعون بمدى وفيزا وماستركارد وApple Pay. تقدّم عليه مرة وحدة من «الإعدادات» ثم «المدفوعات». الطلب هو بطاقة «فعّل الدفع بالبطاقة» في الصفحة، وأول ما ينحفظ النموذج يصير اسمها «طلب التفعيل» ويظهر فوقها رقم خطوتك من 7. الدفع عند الاستلام يبقى شغال طول الوقت.

مين يقدر يقدّم

يقدّم مالك المتجر بس، لأن الطلب يوقّع عن النشاط بهويته وحسابه البنكي. عضو الفريق ما يقدر يقدّم حتى لو دوره يفتح له صفحة المدفوعات. ولازم يكون عندك متجر قبل كذا، وإذا ما عندك متجر تطلب منك الصفحة تنشئ واحد. تقدّم بإحدى صفتين: «فرد» بوثيقة عمل حر، أو «نشاط تجاري» بسجل تجاري.

الخطوات السبع

  1. «نشاطك»: اختر طريقة بيعك، واكتب بيانات هوية المالك وأرفق صورتها.
  2. «عنوانك الوطني»: اكتب عنوانك المختصر وأرفق إثبات العنوان.
  3. «المستندات»: شهادة الآيبان والمستندات اللي تناسب إجاباتك.
  4. «مراجعة عقيل»: نراجع طلبك ونشوف متجرك وهو منشور.
  5. «اتفاقية المدفوعات»: توقّع اتفاقيتك مع سرداب لما نجهزها لك.
  6. «التوقيع عبر نفاذ»: تأكد عبر نفاذ إن الطلب لك.
  7. «مراجعة بوابة الدفع»: بوابة الدفع تراجع الطلب وتوافق على الحساب.

كل خطوة تخلص تطلع جنبها «تمت».

تعبئة أول ثلاث خطوات

الخطوات من 1 إلى 3 نموذج واحد، وما فيه زر حفظ أول مرة: النموذج يحفظ نفسه بعد لحظة من آخر خانة مطلوبة تعبّيها. اللي تكتبه والملفات اللي ترفقها تبقى في هذا المتصفح لو حدّثت الصفحة، وتنمسح لما تسجّل خروج. وإذا حاولت تطلع والنموذج ناقص وفيه شي ما انحفظ، ينبهك المتصفح.

بعد الحفظ تتقفل الخانات ويظهر زر «تعديل». تفاصيل كل مستند ومقاسات الملفات في مقال مستندات الدفع بالبطاقة.

إجاباتك في «نشاطك» تثبت أول ما ينفتح حسابك عند بوابة الدفع، وتشوف تحتها: «تحدّدت عند إنشاء حسابك وما تتغيّر الآن.» راجعها زين قبل موافقتنا.

بعد ما يكمل الطلب

الطلب الكامل يوصلنا تلقائيا. مراجعتنا تشوف متجرك وهو منشور، فإذا كان ناقص تعرض خطوة «مراجعة عقيل» اللي لازم تخلّصه أول، مثل نشر المتجر وبيانات التواصل والسياسات بالعربي. أول ما تخلّصه يوصلنا الطلب بنفسه.

وإحنا نراجع، وقّع اتفاقية المدفوعات إذا ظهرت في الخطوة 5، لأننا ما نوافق قبل توقيعها. بعد موافقتنا يظهر زر «التوقيع عبر نفاذ» في الخطوة 6 أول ما يجهز، وبعد توقيعك تراجع بوابة الدفع الطلب. إذا وافقت، تقرأ في الحالة «نجهّز الدفع» لين نشغّل الدفع، وبعدها «شغّال».

ما تحتاج تخلي الصفحة مفتوحة. كل ما ترجع للتبويب تتحقق الصفحة من آخر حالة بنفسها وتعرض «جاري التحقق...». ولما يكون الطلب عند بوابة الدفع، نراسلك على بريدك أول ما يقدر متجرك يقبل البطاقات.

بعد التفعيل

ينطوي الطلب تحت «مستنداتك»، وتقدر تعاين منه اللي رفعته وتنزّله. وتظهر في الصفحة «طلبات البطاقة»، و«الحساب البنكي» إذا عندنا بيانات الآيبان اللي رفعتها. ورسوم كل عملية تشوفها في نفس الصفحة تحت «رسوم كل عملية»، وتفاصيلها في مقال رسوم الدفع.

المزيد في المدفوعات