انتقل للمحتوى

اشتغل مع عقيل، مساعدك في كل صفحة

افتح عقيل من أي صفحة، وارجع لمحادثاتك، ووافق على اللي يغيّره.


عقيل هو المساعد اللي داخل لوحتك. يجاوبك عن متجرك من بياناته، ويقدر يغيّر فيه، وقبل أغلب التغييرات يطلب موافقتك. تفتحه من زر «عقيل» في الشريط العلوي لأي صفحة، وعلى الجوال من الزر اللي في آخر الشريط السفلي.

من وين تفتحه

  • زر «عقيل» في الشريط العلوي: يفتح المحادثة على جنب الصفحة. «تكبير» يخلّيها بكامل الشاشة، و«تصغير» يرجّعها على الجنب، و«إغلاق» يسكّرها. على الجوال تفتح بكامل الشاشة.
  • «الرئيسية»: اكتب في خانة «اشتغل مع عقيل» وأرسل، وتنفتح المحادثة بكامل الشاشة.
  • في الاستوديو المحادثة اللي جنب المعاينة هي نفسها عقيل، ونفس محادثاتك.

إذا فتحته من صفحة طلب أو منتج أو خصم أو عميل، تطلع فوق خانة الكتابة علامة مثل «بخصوص هالطلب»، فيعرف عقيل إن كلامك عنه. احذفها إذا سؤالك عن شي ثاني.

وش يقدر عليه

  • يجاوبك من أرقام متجرك: المبيعات وعدد الطلبات ومتوسط الطلب وأكثر المنتجات مبيعا لفترة تحددها، ويعرض لك طلباتك ومنتجاتك وأقسامك وأكواد الخصم.
  • يوديك للمكان اللي تطلبه: صفحة، أو منتج باسمه، أو طلب برقمه. يفتحه ويكتب لك سطر واحد مثل «هذي طلباتك.»
  • يبني متجرك ويعدّل تصميمه. النتيجة تنزل على المسودة، والنشر بيدك أنت.
  • ينقل متجرك من سلة أو زد أو شوبيفاي إذا أعطيته رابطه.
  • يحفظ معلومة عن متجرك أو عن طريقتك في الشغل، وينساها إذا طلبت.

الإعدادات وترجيع المبالغ للعملاء ونشر المتجر تبقى بيدك: عقيل ما يغيّرها.

التغييرات اللي يطلب موافقتك عليها

قبل أغلب التغييرات على بيانات متجرك يوقف عقيل ويسألك. السؤال يجي بواحد من شكلين:

  • سؤال محدد ومعه «وافق» و«لا، خلّها»، مثل «أسجّل شحن الطلب 1042؟». يجي كذا مع تسجيل شحن طلب، وإلغاء طلب، وتسجيل طلب دفع عند الاستلام، وتعديل سعر منتج أو حالته، وإنشاء قسم (مجموعة) أو تغيير منتجاته. «وش بيتغيّر» يعرض لك التفاصيل. ولو أرسلت رسالة جديدة قبل ما ترد تنلغي، وإذا مرّ يوم بدون رد ما ينفّذها.
  • بطاقة اقتراح عنوانها «منتج جديد» أو «كود خصم»، ومعها «وافق ونفّذ» و«احذفه». تجي مع المنتج الجديد بعد ما تنشر متجرك، ومع كود الخصم الجديد. عقيل ما يكتب شي لين توافق، والاقتراح يبقى ينتظرك حتى لو سكّرت المحادثة.

فيه تغييرات تمشي بدون بطاقة. بناء المتجر وتعديل تصميمه ينزلون على المسودة. ونقل متجرك من رابط تعطيه لعقيل يبدأ على طول. ولين تنشر متجرك أول مرة، المنتجات اللي توصفها لعقيل تنضاف للمتجر مباشرة وحالتها «معروض».

محادثاتك

  • يفتح عقيل على آخر محادثة لك إذا اشتغلت عليها خلال آخر 24 ساعة، وغير كذا يفتح محادثة جديدة.
  • «محادثة جديدة» تبدأ من الصفر، و«المحادثات» تعرض السابقة مرتبة «اليوم» و«أمس» و«آخر 7 أيام» و«أقدم»، وفيها بحث.
  • لكل محادثة «غيّر الاسم» و«حذف». والحذف نهائي: تنحذف المحادثة ومعها أي اقتراحات فيها ما وافقت عليها.
  • المحادثات تخص المتجر اللي أنت فاتحه.

إذا ما ضبط

  • «رسايل كثيرة ورا بعض. انتظر دقيقة وعاود.»: انتظر دقيقة ثم أرسل.
  • «عندي ضغط الحين. جرب بعد شوي.» أو «عقيل متوقف الحين. جرب بعد شوي.»: الخلل من عندنا ومؤقت. جرّب بعد شوي.
  • «خلّص رصيد الذكاء الاصطناعي لهالشهر على باقتك…»: خلص الرصيد الشهري، ويرجع أول الشهر الجاي.
  • «الاقتراح تعدّى حدود متجرك.»: التغيير أكبر من اللي نسمح لعقيل ينفّذه. نفّذه بنفسك من صفحة المنتج أو الخصم.

المزيد في الاستوديو