انتقل للمحتوى

قائمة عملائك

مين يطلع في «العملاء»، وكيف تبحث فيهم وتصدّرهم وتقرأ سجلهم.


«العملاء» تحت «الطلبات» في القائمة الجانبية، وفيها كل شخص يعرفه متجرك: سجل واحد لكل رقم جوال. نعرض 25 عميل في الصفحة، وترتيبهم ثابت حسب آخر طلب.

مين يصير عميل

  • اللي أول ما عرفه متجرك كان من طلب بدون تسجيل دخول. يطلع على سجله «انضاف مع طلب».
  • اللي يسجّل دخوله في متجرك قبل أي طلب: «سجّل بنفسه». العلامة تبين كيف وصلك أول مرة، وما تتغير لما يطلب بعدين.
  • اللي يراسلك من نموذج التواصل في متجرك وما يطابق أحد عندك: «راسلك من متجرك».
  • اللي تضيفه أنت، أو تضيفه كعميل جديد وأنت تسجّل طلب بنفسك. هذول ما يطلع عليهم شي.

علامة «موثّق» الخضراء جنب الرقم تعني إن العميل أكّد رقمه بكود وصله برسالة.

وش تعرض القائمة

  • «العميل»: الاسم وتحته الجوال.
  • «الوسوم»: أول وسمين، والباقي كعدد.
  • «آخر طلب»: تاريخه، أو «ولا مرة».
  • «الطلبات»: كل طلباته، حتى الملغية.
  • «المصروف»: مجموع طلباته غير الملغية بعد ما ننقص المبالغ المسترجعة.

النقطة قبل الاسم تعني «فيه رسالة ما قريتها».

«الكل» فيه الجميع، و«راسلوك» فيه اللي عندهم رسالة ما قريتها. تبويبات الفئات الأربعة («يرجعون» و«أكثرهم شراء» و«غابوا» و«جدد») تطلع بس لما يكون اللي يطابقون البحث 100 عميل أو أقل، فإذا قائمتك أكبر ابحث أول عشان تضيّقها. خانة البحث «الاسم أو الجوال أو الإيميل» تبحث في الاسم والجوال والإيميل، وتلقى الكتابات المختلفة للاسم (ساره تلقى سارة). البحث ما يشمل الوسوم، وما فيه فلاتر ولا ترتيب ثاني.

صدّر عملاءك

  1. افتح القائمة اللي في آخر سطر البحث.
  2. اضغط «صدّر العملاء»، وينزل عندك ملف customers.csv.

الملف يتبع البحث بس، مو التبويب اللي أنت فيه: لو صدّرت وأنت في «أكثرهم شراء» يجيك كل اللي لقاهم البحث. أعمدته بهذا الترتيب:

name,phone,email,tags,created_at,phone_verified_at,first_name,last_name

ما فيه عدد الطلبات ولا المصروف ولا العناوين ولا الملاحظات. الحد 5000 صف، الأحدث أول، وإذا كانوا أكثر تقول لك القائمة قبل ما تضغط. وإكسل يفتح الملف والعربي سليم.

وش تعرض صفحة العميل

افتح أي صف وتشوف «نظرة سريعة»: «الطلبات» و«المصروف» و«آخر طلب» و«عميل من» (تاريخ أول طلب، أو تاريخ إضافة السجل). ما فيه متوسط للطلب. وتحتها «البيانات» و«طلباته» (أحدث 200 طلب) و«سجل التعامل» بملاحظاتك وكل اللي صار (طلبات ورسائل وإيميلات أرسلناها له)، و«الوسوم» وعناوينه.

الوسوم علامات لك أنت: تطلع في القائمة وفي ملف التصدير، بس ما تقدر تبحث فيها ولا تفلتر بها، وما يتغير شي في المتجر بسببها.

المزيد في العملاء