تقدر تضيف عميل بنفسك من «العملاء» بزر «أضف عميل»، وتعدّل أي عميل من صفحته. إضافة العميل ما ترسل له شي، ولا تفتح له حساب في متجرك.
أضف عميل
- افتح «العملاء» واضغط «أضف عميل».
- في «البيانات» اكتب «الجوال» واختر دولته. هو الخانة الوحيدة المطلوبة. «الاسم الأول» و«اسم العائلة» و«الإيميل» اختيارية.
- في «العنوان» اضغط «أضف عنوان» إذا تبي. تقدر تضيف لين 5 عناوين، والأول هو «الأساسي».
- في «ملاحظات» اكتب أي شي تبي تتذكره عنه، وتنحفظ كأول ملاحظة في سجله.
- اضغط «أضف العميل».
إذا الرقم عند عميل ثاني، يطلع لك «الرقم هذا عند عميل ثاني.» مع «افتح سجله» يوديك له. ما يصير عميلين بنفس الرقم، بس الإيميل ممكن يتكرر.
عدّل البيانات والعناوين
في صفحة العميل عدّل خانات «البيانات» واضغط «احفظ». إذا العميل وثّق رقمه برسالة، الجوال يكون مقفل: «وثّق رقمه برسالة، فما ينعدّل من هنا.» لأنه رقم دخوله لمتجرك.
- «أضف عنوان» أو «أضف عنوان ثاني»: اختر الدولة أول. في السعودية تكتب «العنوان المختصر» بس، ونجيب الباقي من العنوان الوطني. والدول الثانية لها خاناتها.
- من «خيارات العنوان»: «اجعله الأساسي» أو «غيّر العنوان» أو «احذف العنوان». الحذف ما يسألك تأكيد.
- كل طلب يجي من متجرك يحفظ عنوانه ويخليه الأساسي، فالعنوان الأساسي اللي اخترته ممكن يتغير لما يطلب العميل مرة ثانية.
الوسوم والملاحظات
في «الوسوم» اكتب في «أضف وسم» واضغط «أضف»، وشيله بعلامة X. كل تغيير ينحفظ على طول. في «سجل التعامل» اكتب في «أضف ملاحظة» واضغط «أضف الملاحظة»، لين 2000 حرف. كل ملاحظة يطلع معها تاريخها وإيميل اللي كتبها من فريقك، والعميل ما يشوفها. الملاحظة ما تنعدّل: احذفها واكتبها من جديد. وباقي السجل نكتبه حنا: طلباته، والسلة اللي تركها، ورسائله، والإيميلات اللي أرسلناها له.
احذف عميل
- في صفحة العميل اضغط «إجراءات أكثر» ثم «احذف».
- اضغط «احذف العميل» للتأكيد.
ينحذف سجله وعناوينه وملاحظاته وسجل التعامل ورسائله. طلباته تبقى، وكل طلب محتفظ بالاسم والجوال والعنوان وقت ما انطلب. وإذا طلب نفس الشخص مرة ثانية، نفتح له سجل جديد.
الحذف ما يرجع. والعميل اللي عنده بطاقات محفوظة في متجرك ما ينحذف: العميل نفسه يقدر يحذف بطاقاته من حسابه في متجرك، وبعدها تقدر تحذفه.