انتقل للمحتوى

لما يتأخر بناء متجرك أو يفشل

معنى رسائل الانتظار والفشل وقت بناء المتجر أو تعديل تصميمه.


بناء المتجر وكل تعديل على تصميمه يشتغل في الخلفية، ونخبرك عنه في محادثة الاستوديو (افتح «المتجر» من القائمة ثم اضغط صورة متجرك). إذا انتظر البناء أو وقف، تطلع لك بطاقة في المحادثة تقول السبب. هنا معنى كل بطاقة بالكلام اللي تشوفه على الشاشة، ووش تجرّب معها.

إذا كان ينتظر دوره

نبني المتاجر واحد ورا الثاني. الانتظار ما يعني إن فيه خلل، وما عندك شي تضغطه.

  • «متجرك في الدور…» ومعها «فيه متجر ثاني ينبني قبل متجرك. ما عليك شي، أول ما يفضى مكان نبدأ.» وأحيانا نكتب لك كم متجر قدامك.
  • «تعديلك في الدور»: تعديل التصميم ينتظر بناء متجرك، أو تعديل طلبته قبله، أو مكان فاضي.
  • «الورشة مشغولة الحين» أو «الجهاز مشغول الحين»: متجرك محفوظ ومكانه محجوز في الدور. تقدر تسكّر الصفحة، والبناء يبدأ من نفسه.

تقدر تطلع من الاستوديو والبناء شغّال أو ينتظر. جرس «التنبيهات» يخبرك لما يخلص: «متجرك جاهز» أو «تعديلاتك جاهزة»، أو واحد من عناوين الفشل اللي تحت.

إذا فشل أول بناء

إذا فشل أول بناء يبقى المتجر بدون تصميم، وما ننشر شي. الجملة اللي كتبتها محفوظة، فما تحتاج تكتبها من جديد.

  • «ما كمل البناء»: اضغط «ابنِ من جديد»، ونبني نفس المتجر مرة ثانية.
  • «ما قدرنا نبدأ البناء»: انتظرنا مكان نص ساعة وما فضى. اضغط «جرّب مرة ثانية».
  • «الجهاز كان مشغول»: ما فيه خلل في متجرك. اضغط «ابنِ من جديد» بعد شوي.
  • «محاولات كثيرة ورا بعض»: انتظر دقيقة ثم اضغط «جرّب من جديد».
  • «ما قدرنا نجهّز متجرك»: صار الخلل قبل ما نبدأ. اضغط «جهّزه من جديد».

إذا فشل تعديل على التصميم

التعديل اللي يفشل ما ينطبق منه شي: مسودتك تبقى مثل ما كانت قبله.

  • «ما مشى التعديل» ومعها «متجرك باقي مثل ما كان. نقدر نجرّب التعديل مرة ثانية.»: اضغط «جرّب مرة ثانية».
  • «الجهاز مشغول الحين» ومعها «متجرك باقي مثل ما كان. جرّب تعديلك بعد شوي.»
  • «تعديلك ينتظر متجرك»: فشل أول بناء وعندك تعديلات تنتظر. اضغط «ابنِ من جديد» فوق، وتعديلاتك تبدأ بالترتيب بعد ما ينبني المتجر.

إذا ضغطت «جرّب مرة ثانية» وما بدأ التعديل، اكتب طلبك من جديد في المحادثة.

البناء أو التعديل اللي يفشل ما يلمس متجرك المنشور: عملاؤك يشوفون آخر نسخة نشرتها.

إذا انقطع اتصال الصفحة بالبناء

  • «انقطع الاتصال بالبناء، ونحاول نرجع له.»: البناء نفسه مكمّل. انتظر أو اضغط «أعد الاتصال».
  • «ما لقينا البناء.» ومعها «يمكن خلص وإحنا ما شفنا. حدّث الصفحة أو أعد الاتصال.»

إذا خلص رصيد الذكاء الاصطناعي

بطاقة «خلّص رصيد الذكاء الاصطناعي لهالشهر» تعني إن البناء والتعديل ما يشتغلون لين يرجع الرصيد أول الشهر الجاي. هذي البطاقة ما فيها زر إعادة، وفيها الإيميل اللي تراسلنا عليه إذا احتجت الرصيد قبل.

إذا ما ضبط

  • برا الاستوديو يطلع لك في «التنبيهات»: «ما اكتمل بناء متجرك» أو «فشل تطبيق تعديلاتك» أو «فشلت إعادة البناء»، ومعها «افتح الاستديو لمتابعة الأمر.» اضغط التنبيه ونفتح لك الاستوديو، وهناك بطاقة الفشل وزرها.
  • إذا رجعت نفس البطاقة بعد ما أعدت المحاولة، راسلنا على support@uqail.com واكتب لنا وش طلبت.

المزيد في الاستوديو