انتقل للمحتوى

خيارات المنتج وأنواعه

أضف مقاسات أو ألوان، وحدد سعر وكمية وصورة كل نوع.


الخيار هو الشي اللي يختلف فيه المنتج، مثل المقاس أو اللون. والنوع هو تركيبة وحدة من قيم الخيارات، مثل أحمر / كبير، وله سعره وكميته ورمزه وصورته. الاثنين في بطاقة «الخيارات والأنواع» في صفحة المنتج (افتح «المنتجات» ثم المنتج).

أضف خيار

  1. اضغط «أضف خيارات مثل المقاس أو اللون».
  2. اكتب «اسم الخيار»، أو اختر واحد من «اقتراحات»: المقاس، الحجم، اللون، الخامة أو الرائحة.
  3. تحت «قيم الخيار» اكتب قيمة واضغط زر الإدخال (Enter)، وكرّرها لكل قيمة.
  4. اضغط «تم». وإذا تبي خيار ثاني اضغط «أضف خيار ثاني».
  5. اضغط «احفظ» عشان تحفظ الصفحة.

عشان تعدّل خيار بعدين، اضغط عليه. اسحب الخيارات أو القيم، أو استخدم الأسهم، عشان ترتّبها. و«احذف» يشيل الخيار.

كيف يتعبّى جدول الأنواع

كل تركيبة من القيم تصير صف من نفسها: لونين وثلاثة مقاسات يطلعون ستة أنواع.

  • النوع الجديد يبدأ بسعر النوع اللي يشاركه في القيم، وإذا ما فيه فبسعر المنتج.
  • كميته تبدأ من 0 وبدون رمز. ومع أول خيار تضيفه ينتقل سعر المنتج للأنواع، بس كميته ورمزه ما ينتقلون، فاكتب الكميات من جديد.
  • ياخذ صورة النوع الأقرب له في القيم.
  • إذا غيّرت اسم خيار أو قيمة، تبقى أسعار أنواعه وكمياتها ورموزها وصورها مثل ما هي.

عدّل نوع واحد

  • «السعر» و«المتوفر» تكتبهم في الصف نفسه. وعمود «المتوفر» يختفي إذا «تتبّع المخزون» مطفي.
  • الصورة: اضغط المربع المنقّط، واختر صورة من صور المنتج أو «ارفع صورة» أو «بدون صورة».
  • «الرمز» له عمود لحاله على الشاشة الكبيرة. وعلى الجوال اضغط «أضف رمز» تحت اسم النوع.
  • اضغط اسم النوع عشان «السعر قبل الخصم» و«تكلفة القطعة» و«الباركود»، و«الوزن (غرام)» إذا المنتج ينشحن.

غيّر كذا نوع مرة وحدة

  1. علّم على الأنواع اللي تبيها، أو على «حدّد كل الأنواع».
  2. اكتب في «السعر» أو «السعر قبل الخصم» أو «تكلفة القطعة» أو «المتوفر». وعلى الشاشة الصغيرة اضغط «عدّل» أول.
  3. اضغط «طبّق». والخانات اللي تركتها فاضية ما تتغير.

«احذف» يشيل الأنواع المحددة، وزر «رجّع النوعين المحذوفين» (بعدد أنواعك) يرجّعها. وما يثبت شي لين تضغط «احفظ».

الحدود والقواعد

  • 3 خيارات بالكثير: «المنتج ياخذ 3 خيارات بالكثير.»
  • 100 نوع بالكثير للمنتج.
  • ما يصير خيارين بنفس الاسم، ولا تتكرر قيمة داخل الخيار: «هذي القيمة موجودة في الخيار.» والكلمة العربية بهمزة أو بدونها نحسبها قيمة وحدة.
  • كمّل الخيار قبل ما تبدأ اللي بعده: «سمِّ هذا الخيار وأضف له قيمة أول.»
  • الباقة لها سعر واحد، فما تاخذ خيارات.
  • في المتجر اللي بأكثر من لغة، تضيف الخيارات وتشيلها وأنت على اللغة الأساسية، وفي اللغات الثانية تكتب أسماءها بس.

إذا ما ضبط معك

  • «هذي التركيبة تطلع 120 نوع، والحد 100. احذف بعض القيم.» (بأرقامك أنت): زر «احفظ» ما يرجع لين يصير المجموع 100 أو أقل.
  • «راجع السعر والمخزون في النوع رقم 3.»: السعر أو الكمية في هذا الصف مو رقم.
  • «ما ضبطت. جرّب مرة ثانية.» بعد ما شلت نوع: يمكن فيه عميل عنده هذا النوع في سلته. رجّع النوع واحفظ، وإذا تبي توقف بيعه خلّ «المتوفر» عنده 0 (ينفع هذا إذا المخزون متتبّع ومختار «وقّف البيع»).
  • «هالمنتج داخل باقة، فما نقدر نحذفه. شيله من الباقة أول.»: النوع اللي شلته قطعة في باقة. شيله من الباقة أول، وبعدها احذفه.

المزيد في المنتجات